3di Laborategia: egiten dutena bezain zainduta dagoen webgunea

Abiapuntua

Gaitasun asko dituen tailer bat, eta ohiko arazo bat: egiten dutena ez da esaldi bakar batean sartzen. Piezak 3Dn inprimatzen dituzte, laserrez mozten eta grabatzen dute, enpresentzako prototipoak egiten dituzte eta behar duenarentzako maketak. Webguneak dena batera kontatzen badu, ez da ezer ulertzen. Zati bat bakarrik kontatzen badu, bezeroak galtzen dira.

Hori zen benetako enkargua: segundo gutxitan argi geratzea zer den 3di, eta zerbait zehatza bilatzen datorrenak bueltarik eman gabe aurkitzea.

Laburbiltzen duen azala eta sakontzen duten orriak

Egitura mistoa aukeratu genuen. Azalak laburpen gisa funtzionatzen du: zer egiten duten, nola lan egiten duten, azken proiektuak, eskuz egindako lanaren galeria, zergatik haiek eta nola jarri harremanetan. Eta zerbitzu bakoitzak, proiektuek bezala, bere orri propioa du.

Horrela, Googlen laser mozketa Gipuzkoan edo neurrirako maketa bat bilatzen duena zuzenean erantzuten dion orrira iristen da, ez azal orokor batera.

Lehenik euskaraz, eta osorik gaztelaniaz

3dik euskaraz lan egiten du, eta webguneak ere bai: hori da hizkuntza lehenetsia. Gaztelaniazko bertsioa ez da laburpen bat ezta itzulpen automatikoa ere; orri berberak ditu, eta testuak hizkuntza bakoitzean landu dira.

Estetika tailerretik dator

Ez genuen kolore txantiloi batetik abiatu. Azalak haien makinaren argazki batekin irekitzen du, logoa kartoian grabatzen, eta handik datoz kartoi, egur eta gris tonuak, eta letra estu eta sendo bat. Webguneak egiten dutenaren antza du: zehatza, arreta galarazten duen apaingarririk gabe.

Aurki ditzaten prestatuta

Orri bakoitzak bilatzaileentzako bere izenburua eta deskribapena ditu, datu egituratuak Googlek uler dezan zer den tailerra eta non dagoen, eta informazioa ordenatuta inguruko negozioei buruzko galderak erantzuten dituzten tresnentzat. Lege testuak haien kasurako idatzita daude, eta harremanetarako formularioa propioa da, hirugarrenen zerbitzurik gabe.

Aurrerago egiteko geratzen dena

Hasierako planteamenduan online denda bat ere bazegoen. Haiekin batera erabaki genuen webgunetik hastea eta denda prest uztea, komeni zaienean aktibatzeko: produktuak gordeta daude eta ez da ezer berregin beharko.

Zein puntutan dagoen

Webgunea amaituta dago eta bere domeinu propioan argitaratzen da. Martxan dagoenean, hemen lotuko dugu bertsio publikoa.

Zer dakar Ondorako webgune batek

• Zure negoziorako pentsatutako egitura: zer doan azalean eta zerk merezi duen bere orria.
• Zure bezeroarentzat idatzitako testuak, euskaraz, gaztelaniaz edo behar dituzun hizkuntzetan.
• Google eta tokiko bilaketarako prestaketa lehen egunetik.
• Zure kasura egokitutako lege testuak eta harremanetarako formularioa.
• Prestakuntza zuk eguneratu ahal izateko, eta mantentzea ahaztu nahi baduzu.